У гэтым годзе спаўняецца ўжо 30 год з таго моманту, як паўстала гомельская “Талака”. З гэтай нагоды 18 снежня на адмысловай імпрэзе сабраліся талакоўцы розных пакаленняў і прыхільнікі арганізацыі.
Варта адзначыць, што гомельская “Талака” — фактычна адзіная з адраджэнскіх арганізацый 1980-х гг., якая існуе дагэтуль. Плённая праца на глебе беларушчыны ў горадзе над Сожам не перарывалася вось ужо 30 год.
Афіцыйная рэгістрацыя ў арганізацыі адбылася ў 1997 годзе і з тых часоў яна мае афіцыйную назву Гомельская моладзевая краязнаўчая грамадская арганізацыя “Талака”.
Святочная вечарына распачалася з прэзентацыі старшыні ГМКГА “Талака” Яўгена Меркіса аб выніках дзейнасці арганізацыі за апошнія гады.
Дзяўчаты-талакоўкі прадэманстравалі прысутным у тайм-клубе “Флэт” шэраг песняў з традыцыйных абрадаў Гомельшчыны.
Цудоўны музычны падарунак зрабіў талакоўцам фолк-гурт “Бан-Жвірба“.
Паводле талакоўскай традыцыі на юбілей прынята ставіць нейкую тэатральную пастаноўку. Не стаў выключэннем і гэты раз. Талакоўцы паставілі вядомы твор Каруся Каганца “Модны шляхцюк”.
Гомельская “Талака” працягне сваю дзейнасць на глебе культурніцкага Адраджэння нашага роднага краю.
Жыве “Талака”!
Аўтар фота: Ларыса Шчыракова
