Адмены канцэртаў у Беларусі працягваюцца. У мінулую пятніцу ў Мінску маглі выступіць гамяльчане ТТ-34, аднак Мінгарвыканкам не выдаў гастрольнае пасведчанне на правядзенне гэтага канцэрта. Фармулёўка: нізкі мастацкі ўзровень. Дакумент з адмовай быў выдадзены арганізатарам яшчэ ў канцы 2018 года, аднак трапіў ён у публічны доступ толькі цяпер.
У дакуменце аб адмове ў выдачы гастрольнага пасведчання чыноўнікі спасылаюцца на пункт 1.3 артыкула 215 Кодэкса аб культуры. Вывучаем яго: «Падставамі для адмовы ў выдачы пасведчання на права арганізацыі і правядзення культурна-відовішчнага мерапрыемства на тэрыторыі Рэспублікі Беларусь з’яўляюцца: заключэнне мастацкага Савета па культурна-відовішчных мерапрыемствах аб нізкім мастацкім узроўні выкананняў, прадугледжаных праграмай культурна-відовішчнага мерапрыемства».
Арганізатары канцэрту ад каментароў адмаўляюцца і просяць іх не называць, бо баяцца, што гэта зможа паўплываць на іх дзейнасць у будучыні.
