Вядомы гомельскі музыка Андрэй Васільеў завёў уласны канал на ютубе Funky Chibis, каб навучыць усіх ахвотных граць на бас-гітары як то робяць сапраўдныя зоркі. Мы вырашылі высветліць, чаму ўдзельнік слыннага гурта Vasabi Jazz Band пачаў дзяліцца сваімі ведамі ды хітрыкамі менавіта праз відэаўрокі.
— Андрэй, адкуль узялася ідэя ўласнага відэаканала на ютубе?
— Здымаць і выкладваць у сацсеткі відэаўрокі я вырашыў па многіх прычынах. Па-першае, назбіралася шмат ахвотных трапіць на заняткі па бас гітары, але з усімі не хапае часу пазаймацца. Відэаўрокі дапамагаюць вырашыць гэтую праблему. Па-другое, за гады заняткаў назапасілася шмат музычнага матэрыялу, якому хочацца даць жыццё. Па-трэцяе, відэа накіравана на развіццё цікавасці да бас гітары ў цэлым, ну і мне проста хочацца дзяліцца сваім музычным вопытам.
— Няўжо ў сецеве не хапае ўрокаў для басістаў?
— Насамрэч у інтэрнэце велізарнае мноства падобных відэа. Сёння без праблем можна знайсці любую інфармацыю і атрымаць праз гэта досыць добрыя музычныя навыкі. Шматлікія відэаблогеры ды прафесійныя музыкі граматна падаюць матэрыял, так што выбар у тым ці іншым выкладчыку залежыць ад вашых музычных пераваг. Галоўнае не ленавацца займацца!
— Значыць можна навучыцца толькі дзякуючы ютубу?
— Вядома, прамыя зносіны з выкладчыкам нішто не заменіць, але відэаўрокі таксама прыносяць сваю карысць.
Напрыклад, музыкам-пачаткоўцам патрабуецца шмат часу, каб разабраць які-небудзь музычны фрагмент, а зрабіць гэта дома з дапамогай відэа на ютубе нашмат прасцей. Часта да мяне на заняткі прыязджаюць нават з іншых гарадоў. Паколькі адлегласці вялікія, то часта так не паездзіш і відэа тут зноўку дапамагае. Гэтак жа з яго дапамогай можна паўтарыць і замацаваць пройдзены з выкладчыкам матэрыял.
— Як стаць крутым басістам?
— Стаць ачмурэнным басістам нескладана! Бярэш дзесяціструнны бас, робіш сябе гучней за ўсе астатнія інструменты і з разбуральнай сілай тузаеш струны, каб усе зразумелі, хто тут галоўны!
)))
Ну, а калі сур’ёзна, то засвоіць бас-гітару не так і складана! Працавітасць, мэтанакіраванасць, жаданне і вядома добры выкладчык — вось залог поспеху. Паступова рухаючыся ад простых фрагментаў да выканання складаных музычных кампазіцый, кожны непрыкметна стане прафесіяналам!
Зычу пачаткоўцам цярпення ў засваенні гэтага цудоўнага інструмента і запрашаю на свае заняткі! Усім міру і дабрыні!
Аўтар інтэрвію: Яўгер Меркіс
