Ініцыятыва “Пошукі старога Гомеля” падарыла выкупленыя чарцяжы праекту Лібава-Роменскага пуцеправода 1901 года музею Гомельскага палацава-паркавага ансамбля. Грошы на іх набыццё збіралі праз краўдфандынг.
Каштоўныя артэфакты перадалі непасрэдна ў рукі Таццяне Шодзе — галоўнаму захавальніку музейных фондаў. Аўтары ініцыятывы спадзяюцца, што гэтыя чарцяжы 1901 году стануць маленькім і раней невядомым пазлам з гісторыі Гомеля.
Самі чарцяжы ўяўляюць сабой два камплекты дакументаў, складзеных у некалькі разоў. Самы вялікі з іх у разгорнутым выглядзе мае больш за два метры ў даўжыню. На аўкцыён быў выстаўлены чарцёж прадольных профіляў пуцепровада, а таксама чарцёж уз’езду на пуцепровад з боку горада.
Пакуль незразумела, для каго прызначаўся гэты пуцепровад — для гужавага транспарта ці для людзей, і дзе ён мусіў знаходзіцца. Аўтары звяртаюцца па дапамогу да ўсіх, хто можа дапамагчы з інфармацыяй на гэты конт.
