Паважанае спадарства!
ГМКГА “Талака” шчыра запрашае ўсіх неабыякавых гамельчукоў 27 траўня прыняць удзел у грамадскім абмеркаванні адной з самых актуальных тэмаў з жыцця нашага горада – лёса гомельскай гістарычнай драўлянай забудовы.
Гістарычная драўляная забудова Гомеля знаходзіцца зараз пад пагрозай поўнага знішчэння. Паводле нядаўна зацверджанага новага генплана развіцця горада ўсю аднапавярховую забудову ў цэнтры горада, нягледзячы на ейную гістарычную, архітэктурную або мастацкую вартасць плануюць знесці.
Намаганні гомельскіх гісторыкаў і актывістаў па стварэнні адмысловых ахоўных зонаў або музеяў пад адкрытым небам пакуль застаюцца марнымі.
Публічнае абмеркаванне праблем і перспектыў захавання гістарычнай забудовы нашага горада пройдзе пры актыўным удзеле экспертаў.
Сярод іх:
– старшыня беларускага Таварыства аховы помнікаў гісторыі і культуры Антон Астаповіч,
– навуковы супрацоўнік філіяла Веткаўскага музея, эксперт па драўляным дэкоры Гомельшчыны Андрэй Скідан
– выкладчык БелДУТ, краязнаўца і гісторык архітэктуры Яўген Малікаў.
Будзе абмеркаванае шырокае кола пытанняў звязаных з выпрацоўкай плана выратавання нашай гістарычнай спадчыны.
Не будзьце абыякавымі!
Прыходзьце самі і запрашайце сяброў!
Калі: 27 траўня, 14.30
Дзе: пакой № 3-3 гасцініцы “Надзея” (побач з гасцініцай “Турыст”, вул. Галавацкага, 19)
Кантакты: (44) 7494166 (Яўген Меркіс)
Падзея Вконтакте: vk.com/zabudova_homel
Падзея ў Facebook: www.facebook.com/events/344261742308394/
Акаўнт у Twitter: twitter.com/talaka_nashkraj
