Свята паэзіі ў гонар Анатоля Сыса «Дух – гэта, людзі, Я!» па традыцыі адбудзецца на радзіме паэта – у вёсцы Гарошкаў 30 кастрычніка, бліжэйшыя выходныя пасля дня нараджэння Анатоля.
У паэтычным свяце, якое ладзіцца шосты год запар, возьмуць удзел знакамітыя пісьменнікі, барды і мастакі з розных куткоў Беларусі: Менска, Гомеля, Рэчыцы, Светлагорска, а таксама родныя і землякі Анатоля, ягоныя сябры.
Сьвята паэзіі пачнецца ў 12 гадзін з ускладання кветак да помніка паэта на могілках у Гарошкаве. Паэтычныя чытанні і бардаўскі канцэрт пройдуць на падворку роднай хаты Анатоля Сыса.
Пад час паэтычнага сьвята адбудзецца прэзентацыя фільма “Сыс пра Сыса”, які стварылі польскія тэледакументалісты па сцэнару Паліны Сцепаненкі. Фільм распавядае пра юнацкія гады Анатоля, ягоных сяброў, родныя мясціны ў Гарошкаве і Гомелі. Таксама будуць шырока прадстаўленыя апошнія публікацыі, прысвечаныя Анатолю Сысу ў часопісах “Дзеяслоў” і “Верасень”, кніга Леаніда Галубовіча “Сыс і кулуары”.
У прыхільнікаў творчасці Анатоля Сыса будзе магчымасць набыць кнігу выбраных твораў паэта “Алаіза”.
Тыя, хто жадае далучыцца да імпрэзы, могуць дабрацца да Гарошкава з Гомеля аўтобусам альбо маршруткай, ці з Рэчыцы гарадскім аўтобусам.
Тэлефоны для даведак:
+375 29 656-93-49 (у Менску)
+375 33 672-24-60 (у Рэчыцы)
