13 студзеня на Стары Новы год, ГМКГА “Талака” вось ужо чатырнаццаць год запар калядуе па Цэнтральным рынку.
Калядоўшчыкі з зоркай, казой і мядзведзём абыходзяць гандляроў, віншуюць з Калядамі, зычаць усяго найлепшага згодна з традыцыяй: “Каб у гэтай хаце было заўжды што даці, каб мякіну не таўклі і хлеб з яе не пяклі”, ”Каб у кожным куточку было па сыночку, а як укоціцца бочачка каб была яшчэ і дочачка”, “Каб былі міскі і лыжкі памыты, і вашыя дзеткі сыты”, “Каб мірна, весела жылося, каб хацелася і маглося”.
У адказ на зычынні гандляры адорваюць калядоўшчыкаў – талакоўцаў цукеркамі, дробнымі падарункамі, грашамі. А хто не частуе калядоўшчыкаў чуе ў свой адрас традыцыйныя калядныя праклёны: “ Каб на святое Ражаство тваю хату разнясло”, “Хто казе не дае, той кепска жыве”. Але на шчасце такіх людзей не багата, большасць прадпрымальнікаў і наведвальнікаў рынка добра рэагуюць на прыход калядоўшчыкаў, якія па народнай традыцыі з’яўляюцца пасланнікамі Бога на зямлі і каб забяспечыць сям’і дабрабыт у надыходзячым годзе, калядоўшчыкаў трэба абавязкова адарыць, пачаставаць.
Задаволеныя і вясёлыя талакоўцаы з мяхамі пачастункаў вяртаюцца дадому, ладзяць святочную вячэру, славяць народную традыцыю, спяваюць песні, танчаць. Усім крыху сумна, што такая добрая традыцыя бывае толькі раз на год.
Старшыня ГМКГА “Талака” Ларыса Шчыракова
